Portrett myndir af Kópavogbúum,Sturlungabardagi og Kynningarbréfið - a podcast by RÚV

MANNLEGI ÞÁTTURINN ÞRIÐJUDAGUR 23.JÚNÍ UMSJÓN GUÐRÚN GUNNARSDÓTTIR OG MARGRÉT BLÖNDAL Við brugðum okkur aftur til Sturlungaaldar hér á eftir og berjumst við hlið Sturlu Sighvatssonar í Örlygsstaðabardaga eða svo gott sem. Á Sauðárkróki er gagnvirk sögusýning sem nefnist 1238 baráttan um Ísland. Þar er frægustu viðburðum Sturlungaaldarinnar (1220 - 1264) gerð skil en þetta er blóðugasta og afdrifaríkasta tímabilið í sögu Íslands þar sem ættar- og höfðingjaveldi börðust í allsherjar borgarastyrjöld sem lauk með því að Íslendingar glötuðu sjálfstæðinu. Áskell Heiðar Ásgeirsson segir okkur betur frá þessari sýningu og ýmsu fleiru líka því nútíminn fær líka sinn sess í húsnæði sýningarinnar. Þar er m.a. veitingastaður og í gærkvöldi voru þar tónleikar með Valdimar og Erni Eldjárn. Margrét Rún Styrmisdóttir er fatahönnuður og teiknari, og frá júní til ágúst er hún frá 9-5 að vinna í portrettteikningum af Kópavogsbúum. Hún sendi út opna beiðni í byrjun sumars og fékk samband við 150 einstaklinga, og vinnur hörðum höndum af því að teikna nákvæmt portrett af hverjum og einum auk þess að eiga í samtali við viðkomandi um daginn og veginn. Þannig fangar hún þversnið af bæjarbúum, sögum þeirra og upplifunum, en hver og einn sendir henni þá mynd af sér sem þau vilja sjálf að birtist. Þá stefnir hún að því að í lok sumars muni hún geta raðað saman mósaíkmynd af sjálfvalinni birtingarmynd bæjarbúa. Í síðustu viku tók Steinar Þór Ólafsson fyrir ferilskrána. En í dag tókum við fyrir kynningarbréfið sem algengt er að óskað sé eftir, en, liggur kannski meira á huldu hvernig eigi að setja fram. Hvað á að skrifa í þetta kynningarbréf? Á þetta að vera ítarlegri upplistun á ferilskránni? Og hversu mikið vægi hefur kynningarbréfið? Getur frábært kynningarbréf bætt upp fyrir skort á t.d. starfsreynslu og menntun? Og hvað á það að vera langt? Steinar talar við Ingu Björg Hjaltadóttur, framkvæmdastjóra Attentus, til að fræðast betur upp þetta óræða skjal sem kynningarbréfið er.

Further episodes of Mannlegi þátturinn

Further podcasts by RÚV

Website of RÚV