Stundin okkar, Ullarvikan og Krummi lesandi vikunnar - a podcast by RÚV

Rannveig og Krummi, Bryndís og Þórður, Sirrý og Palli, Gunni og Felix, Birta og Bárður, Björgvin Franz, Gói og miklu fleiri. Þetta eru auðvitað umsjónarfólk Stundarinnar okkar í gegnum tíðina. Næsta sunnudag hefur Stundin okkar aftur göngu sína í sjónvarpinu með nýju umsjónarfólki. Höfundar Stundarinnar okkar í ár eru kornungir, allir tuttugu og tveggja ára, en eru síður en svo reynslulausir. Þeir hafa skrifað nokkur leikrit, bækur og efni fyrir sjónvarp. Þeir eru allir að læra leiklist og við fengum tvo þeirra, þá Mikael Kaaber og Arnór Björnsson, í viðtal til að segja okkur frá sér og um hvað Stundin okkar verður í þeirra meðförum. Þessa vikuna fer fram í fyrsta skipti Ullarvika sem haldin er á Suðurlandi. Miðstöð ullarvikunnar verður í Félagsheimilinu Þingborg í Flóa og megindagskráin fer þar fram. Boðið verður upp á námskeið í handverki og fengnir til þess kennarar frá m.a. Íslandi, Skotlandi, Noregi og Bandaríkjunum. Við hringdum í Maju Siska og fengum hana til að segja okkur frá Ullarvikunni. Lesandi vikunnar í þetta sinn var tónlistarmaðurinn Krummi Björgvins. Hann var söngvari hljómsveitanna Mínus, Esju og Legend og hefur svo gert tónlist undir eigin nafni. Krummi stýrir nú útvarpsþáttunum Krummi krunkar úti á sunnudagsmorgnum á Rás 2. Við fengum hann til að segja okkur frá því hvaða bækur hann hefur verið að lesa undanfarið og hvaða bækur og höfundar hafa haft mest áhrif á hann í gegnum tíðina. UMSJÓN GUÐRÚN GUNNARSDÓTTIR OG GUNNAR HANSSON

Further episodes of Mannlegi þátturinn

Further podcasts by RÚV

Website of RÚV