MDE tekur fyrir Landsréttarmálið Neysla kókaíns eykst - a podcast by RÚV

Yfirdeild Mannréttindadómstóls Evrópu ákvað í dag að taka fyrir Landsréttarmálið svokallaða og lengist þar með enn biðin eftir endanlegri niðurstöðu í málið. Stígur Helgason ræddi við Berglindi Svavarsdóttur, formann lögmannafélags Íslands. Fyrir tveimur mánuðum, þegar Boris Johnson tók við sem forsætisráðherra Breta bauð írski forsætisráðherrann Leo Varadkar honum strax í heimsókn til að ræða útgöngu Breta úr Evrópusambandinu. Það var fyrst í morgun að Johnson gaf sér tíma til fundar í Dyflinni. Sem fyrr er allt óklárt heima fyrir: Johnson slær úr og í um útgöngusamning og hefur ekki lengur tök á framvindunni því hann hefur ekki meirihluta í þinginu. Hann getur því ekki efnt til kosninga í bráð og þingið gæti neytt hann til að fresta áætlaðri útgöngu úr ESB 31. október. Anna Kristín Jónsdóttir talaði við Sigrúnu Davíðsdóttur. Þriðjungi fleiri komu á bráðamóttöku Landspítalans vegna fíkniefnaneyslu síðsumars en gera í venjulegum mánuði. Yfirlæknir bráðalækninga segir aukna kókaínneyslu áberandi og hún sé ekki bundin við neinn einn þjóðfélagshóp. Afleiðingarnar geti verið hjartaáfall. Ráðgjafi á meðferðarheimilinu Hlaðgerðarkoti segir það algera undantekningu að fólk komi í meðferð vegna áfengisneyslu. Hópurinn þar sé yngri en áður og í vanda vegna neyslu á hörðum fíkniefnum. Og það er ekki skrítið að neyslan á kókaíni hafi aukist eins og fram kom í fréttum nýverið. Kristín Sigurðardóttir talaði við Sigurð Hólmar Karlasson og Jón Magnús Kristjánsson.

Further episodes of Spegillinn - Hlaðvarp

Further podcasts by RÚV

Website of RÚV